काठमाडौं । इराक र टर्कीबीच इराक–टर्की पाइपलाइनमार्फत कच्चा तेल टर्कीको सेहान बन्दरगाहसम्म पुर्याई विश्व बजारमा निर्यात गर्ने नयाँ एकवर्षीय सम्झौता भएको छ। इराकको तेल मन्त्रालयका अनुसार सम्झौताअन्तर्गत दैनिक कम्तीमा ७ लाख ५० हजार ब्यारेल कच्चा तेल उक्त पाइपलाइनमार्फत निर्यात गरिनेछ। इराकी तेलमन्त्री बासिम मोहम्मद खुदैरले सम्झौता कार्यान्वयनका लागि दुवै देशका सम्बन्धित कम्पनीहरूले आवश्यक प्रक्रिया अघि बढाइसकेको बताएका छन्।
इराकी प्रधानमन्त्री अली अल–जैदीले तेल, विद्युत्, जलस्रोतलगायत पारस्परिक हितका क्षेत्रमा सहकार्य विस्तार गर्न दुवै देशले व्यापक कार्यढाँचा तयार गर्ने प्रक्रियालाई अघि बढाउने जानकारी दिएका छन्। टर्कीका ऊर्जा तथा प्राकृतिक स्रोतमन्त्री अल्पार्सलान बायराक्तारले सेहान बन्दरगाह हुँदै हुने इराकी तेल निर्यात क्षेत्रीय तथा विश्वव्यापी ऊर्जा आपूर्ति सुरक्षाका लागि रणनीतिक रूपमा महत्वपूर्ण रहेको बताएका छन्।
सेहानमार्फत इराकी तेल निर्यातसम्बन्धी दशकौँ पुरानो सम्झौताको अवधि सोमबार समाप्त हुन लागेकाले नयाँ सम्झौता गरिएको हो। ‘स्ट्रेट अफ होर्मुज’ क्षेत्रमा बढ्दो तनावका कारण ढुवानीमा जोखिम बढिरहेका बेला इराकले वैकल्पिक निर्यात मार्ग सुरक्षित गर्ने रणनीति अपनाएको छ।
कच्चा तेल निर्यात इराकको अर्थतन्त्रको प्रमुख आधार मानिन्छ। तेलबाट प्राप्त आम्दानीले देशको कुल सरकारी राजस्वको करिब ९० प्रतिशत हिस्सा ओगट्ने गरेको छ।
