काठमाडौँ । माउण्ट एभरेष्ट पावर लिमिटेडले सर्वसाधारणका लागि निष्कासन गरेको साधारण शेयर (आइपीओ) को आज औपचारिक रूपमा बाँडफाँड कार्य सम्पन्न गरेको छ । कम्पनीको धितोपत्र निष्कासन तथा बिक्री प्रबन्धक एनआईएमबि एस क्यापिटलको केन्द्रीय कार्यालयमा आज बिहान ८ः३० बजे शेयर बाँडफाँड कार्य सफलतापूर्वक सम्पन्न भएको हो ।
बिक्री प्रबन्धकका अनुसार गोलाप्रथाका माध्यमबाट गरिएको यस आइपीओ बाँडफाँडमा भाग्यमानी १ लाख ४२ हजार ७६० जना सर्वसाधारण लगानीकर्ताले जनही १० कित्ताका दरले कुल १४ लाख २७ हजार ६ सय कित्ता शेयर प्राप्त गरेका छन् । नेपाल धितोपत्र बोर्डले गत वैशाख २ गते यस कम्पनीलाई सर्वसाधारणमा आइपीओ निष्कासन गर्नका लागि अन्तिम अनुमति प्रदान गरेको थियो, जस अनुरूप कम्पनीले असार ३ गतेदेखि असार ८ गतेसम्म सो परिमाणको शेयर बिक्रीमा ल्याएको थियो ।
जलविद्युत् क्षेत्रमा लगानीकर्ताको आकर्षण बढिरहेका बेला माउण्ट एभरेष्ट पावरको आइपीओमा पनि मागभन्दा बढी आवेदन परेका कारण सबै आवेदकलाई शेयर नपुग्ने भएपछि गोलाप्रथाको विधि अपनाउनुपरेको क्यापिटलले जनाएको छ । आइपीओ परेका सफल लगानीकर्ताहरूको डिम्याट खातामा शेयर जम्मा भएपछि नेप्सेमा सूचीकरण प्रक्रिया अगाडि बढ्नेछ र त्यसपछि दोस्रो बजारमा शेयर कारोबार खुला हुनेछ।
कम्पनीले सोलुखुम्बु जिल्लामा कुल १२ मेगावाट क्षमताको दुधकुण्ड खोला जलविद्युत् आयोजनाको भौतिक निर्माण कार्य पूर्ण रूपमा सम्पन्न गरिसकेको छ । आयोजनाले विं.सं. २०८१ साल साउन महिनादेखि नै व्यावसायिक रूपमा विद्युत् उत्पादन सुरु गरी राष्ट्रिय प्रसारण लाइनमा प्रवाह गरिरहेकाले यस कम्पनीको वित्तीय अवस्था बलियो रहने र लगानीकर्ताले छिट्टै प्रतिफल पाउने विश्वास गरिएको छ ।
