काठमाडौं । साहस उर्जा लिमिटेडले प्रस्ताव गरेको शतप्रतिशत हकप्रद शेयर निष्कासनका लागि विद्युत नियमन आयोगले पूर्व स्वीकृति प्रदान गरेको छ । कम्पनीले यस वर्षको २१ प्रतिशत बोनस शेयर वितरणपछि कायम चुक्तापूँजी ४ अर्ब ५७ करोड ३८ लाख रुपैयाँको आधारमा सोही बराबर हकप्रद शेयर निष्कासन गर्ने प्रस्ताव गरेको हो । कम्पनीले विद्युत नियमन आयोगमा चैत १२ गते निवेदन पेश गरेकोमा आयोगको चैत १२ गतेको बैठकले पूर्व स्वीकृति प्रदान गरेको हो ।
नेपाल धितोपत्र बोर्डमा हकप्रद शेयर निष्कासनका लागि निवेदन पेश गर्नुअघि विद्युत नियमन आयोगबाट पूर्व स्वीकृति लिनुपर्ने व्यवस्था बमोजिम कम्पनीले आयोगको पूर्व स्वीकृति लिएको हो । हकप्रद शेयर निष्कासनबाट प्राप्त रकम टाइम्स इनर्जी प्रालिद्वारा प्रवर्धित ३४० दशमलव ४२३ मेगावाट क्षमताको बुढीगण्डकी जलविद्युत आयोजनामा लगानी गर्ने योजना कम्पनीको छ । गत मंसिर २४ गते सम्पन्न वार्षिक साधारण सभाबाट कम्पनीले हकप्रद शेयर निष्कासनको प्रस्ताव पारित गरिसकेको छ । यस वर्ष कमपनीले कुल २२ दशमलव १० प्रतिशत लाभांश वितरण गरेको हो ।
२१ प्रतिशत बोनस शेयर र कर प्रयोजनका लागि १ दशमलव १०५३ प्रतिशत नगद लाभांश यस वर्ष कम्पनीले वितरण गरेको होे । गत वर्षदेखि लाभांश वितरण गर्न सुरु गरेको यस कम्पनीले गत वर्षभन्दा यो वर्ष बढी लाभांश वितरण गर्न लागेको हो गत वर्ष कम्पनीले ८ प्रतिशत बोनस शेयर र कर प्रयोजनका लागि शून्य दशमलव ४२ प्रतिशत गरी कुल ८ दशमलव ४२ प्रतिशत लाभांश वितरण गरेको थियो ।
चालू आर्थिक वर्षको दोस्रो त्रैमाससम्म कम्पनीको नाफा ९० करोड ४८ लाख रुपैयाँभन्दा बढी रहेको छ । यस अवधिसम्म कम्पनीको जगेडा कोष रकम ३ अर्ब २२ करोड रुपैयाँभन्दा बढी रहेको छ । वार्षिक प्रतिशेयर आम्दानी ३९ रुपैयाँ ५७ पैसा रहेको यस कम्पनीको प्रतिशेयर नेटवर्थ भने १७० रुपैयाँ ७२ पैसा छ ।
