काठमाडौं । नेपालमा सञ्चालनमा रहेका २० वाणिज्य बैंकले कुल ५१ खर्ब १ अर्ब ८६ करोड रुपैयाँभन्दा बढी कर्जा प्रवाह गरेका छन्, जुन गत आर्थिक वर्षको सोही अवधिको तुलनामा ६.१२ प्रतिशतले वृद्धि हो। चालु आर्थिक वर्षको चैत मसान्तसम्म वाणिज्य बैंकहरूको कर्जा लगानीमा सामान्य वृद्धि देखिएको छ।
गत आर्थिक वर्षको चैत मसान्तसम्म यी बैंकहरूले ४८ खर्ब ७ अर्ब ४८ करोड रुपैयाँ कर्जा प्रवाह गरेका थिए। यस वर्ष कर्जा लगानी विस्तार भए पनि सबै बैंकमा समान रूपमा वृद्धि भने देखिएको छैन।
उपलब्ध विवरणअनुसार २० मध्ये १५ वाणिज्य बैंकले कर्जा प्रवाह बढाएका छन् भने ५ बैंकमा गिरावट आएको छ। कर्जा प्रवाह घट्ने बैंकहरूमा नेपाल इन्भेष्टमेन्ट मेगा बैंक, हिमालयन बैंक, प्रभु बैंक, एनआईसी एशिया बैंक र स्ट्यान्डर्ड चार्टर्ड बैंक रहेका छन्।
नेपाल इन्भेष्टमेन्ट मेगा बैंकको कर्जा ०.१७ प्रतिशतले घटेर ३ खर्ब ४१ अर्ब रुपैयाँ पुगेको छ भने हिमालयन बैंकको कर्जा ०.१० प्रतिशतले घटेको छ। प्रभु बैंकको कर्जा १.०९ प्रतिशतले घट्दा एनआईसी एशिया बैंकको कर्जा पनि केही घटेको छ। सबैभन्दा ठूलो गिरावट स्ट्यान्डर्ड चार्टर्ड बैंकमा देखिएको छ, जसको कर्जा प्रवाह १४ प्रतिशतले घटेर करिब ७७ अर्ब रुपैयाँमा सीमित भएको छ। चैत मसान्तसम्म सबैभन्दा कम कर्जा प्रवाह गर्ने बैंक पनि यही रहेको छ।
यता, सबैभन्दा बढी कर्जा प्रवाह गर्ने बैंकको रूपमा नबिल बैंक अगाडि रहेको छ। नबिल बैंकले ४ खर्ब ६४ अर्ब रुपैयाँभन्दा बढी कर्जा प्रवाह गरेको छ। दोस्रो स्थानमा ग्लोबल आइएमई बैंक रहेको छ, जसको कर्जा प्रवाह ४ खर्ब ५६ अर्ब रुपैयाँभन्दा बढी रहेको छ।
